Tchanson pou l'cras-mârdi
El tchanson du momint ès' crite
pa vo n-animateû Djan
Vos-avèz n'saqwè à m'dîre ou bén à m'dimander,
vos s'crîjèz dissus m'bwêsse
Cet adresse mail est protégé contre les spambots. Vous avez d'activer le javascript pour la visualiser.
Pou l'momint :
Cras-mârdi èt cârnaval
Dji s’ré djîle
Quand dj’vous vîr mès copins, dji m’va dins leû pat’lin
Et nos buvons l’dérin au cabarèt du cwin.
Asto d’èl vîye djindjole, dji choûte èn-ér di viole;
Dj’é ostant di pléjî qu’in djoû di cras mârdi.
Adon à Châlèrwè, c’èst folîye èyèt jwè :
Lès grands come lès pus p’tits trîyan’nut di pléjî,
Avou leûs loques di djîle pou djiper en famîye
Tchapia à plomes su l’tièsse, is sont dèdjà à l’fièsse.
A chîj-eûres du matin, èvôye pou l’gros twin-twin :
Gn-a dèdjà ène boune douzène pou fén dès-ârguèdènes.
Grosse késse èt tamboureûs sont dèdjà tout eûreûs,
F’yant clatchi leûs chabots èt soner leûs gèrlots.
Et mi, dji seu dins l’binde, avou d’èl jwè à r’vinde :
Lès djîles sont distchin.nès, l’s-oranges vont d’tous costès.
Lès djins, min.me lès pus losses, vèn’nut pou djonde lès bosses
Is-i mèt’nut d’l-ârdeûr : parèt qu’ça pôrte boneûr.
T’t-aleûr quand l’gnût tchéra, is s’ront co tèrtous là :
Tous lès groupes rachonès, is pouront co danser
Is tchant’ront co bran.mint, quasi djusse qu’au lèd’mwin;
Mins ène mîyète pus taurd, pourtant èl djîle s’ra môrt.
En vûdant l’dérin vêre, nos nos dîrons ar’vwêr;
Mins v’là qu’dji m’èr’lève : tout ça n’èsteut qu’in rêve.
Ca valeut vrémint l’pwêne di fén parèye fèrdène
Dji pou vos-assurer qui djîle in djoû dj’è l’s’ré!
Er'frin :
Céns d’èl Vile qui nos sont tchèrs, ètou du Pays Nwêr,
Et min.me lès Comèrcants ou lès Récalcitrants
Toudi prèsse à boudjî, mins ètou à lancî
Dès-oranges ausès djins tindant sins djoque leû mwin.
C’èst seûr qui djîle, dj’è l’s’ré. Oyî in djoû dj’è l’s’ré.
Dji vou awè n’téle tchance èyèt mète di l’ambîyance.
Tchanson pou l'Sint Valentin
El Sint Valentin
Dèclâracîyon à in p’tit pouyon
Dj’vôreu toudi vos prinde
Dins mès bras sins ratinde
Et vos dîre toute èm’ jwè
D’vos-awè rèscontrè
Tél.mint dj’in.me bén d-aler
Avou vous m’pourmwin.ner
Tous lès sèm’dis au gnût
Dins lès bos sins fén d’brût,
Pace qui dins m’è p’tit coeûr
Dji r’sins bran.mint d’bouneûr.
Gn-a bén pacôps d’èl plouve
Mins chaque côps dji vos r’trouve
Et qu’impôrte lès sésons
Dji seu toudi dins l’bon.
S’i gn-âreut du fôrt vint,
Dji vos tindreu l’mwin
Maugré l’bîje qui chufèle
Su vos doucès machèles
Et quand r’vénra l’printemps,
Dji r’trouv’ré mès vint-ans.
S’i gn-âreut du solia,
Dji s’reu bén dins vos bras,
Dji r’trouv’reu co m’djon.nèsse
Pou vos fén dès carèsses.
Quand s’èvont lès nuwâdjes,
V’là qu’dji pinse au mariâdje;
Mins dji téns à vos l’dîre :
Qui ça n’sâreut yèsse pîre
Qui t’toutes lès p’titès stwèles
C’èst seûr’mint vous l’pus bèle.
In bètch su vo machèle,
Ca i èst, v’là qu’dji trembèle
Dji r’wéte dins vo côrsâdje,
Dji rèbrasse vo visâdje,
Qui dj’ôse à pwêne touchi
Peû d’sèrer vos bias-îs.
Vos bèlès mwins tindûwes
Em’ souwét’nut l’bénv’nûwe :
Dji n’èm’ sins nén méreseû,
Et dji d’è seu st-eûreûs.
Er'frin :
Cu qu’dji pou souwétî
Eyèt çoulà pou d’bon
C’èst bén d’vos vîr voltî
Eyèt çoulà pou d’bon
C’èst ç’qui dj’pou souwétî
Enn’ do m’è p’tit pouyon.
Radîyo Quartz, boun-anivèrsére
Radîyo Quartz
C’è-st-au cominch’mint
Dès-anéyes quatrè vint
Dins l’frèdeû di janviè
Qu’is s’avit rachonès,
Lès saquants coumarâdes
Ont v’lu fén au pus râde :
Is-ont montè n’radîyo
Dins l’guèrnî d’ène maujo.
Lès curseûrs abachîs,
El musique a brotchî
A r’lâye di long en laudje
Pou dès choûteûs binaujes.
Gn-a yeû d’s-animateûs
Pou rinde lès djins eûreûs
Dès-autes ont arivè
Et tout s’a bén passè.
Lès-anéyes ès’ sont chû
Douc’mint sins trop fén d’brût
El radîyo a grandi
Intèrnèt è-st-insi.
Ene antène libèréye,
Ene èquipe rachonéye
Qué pléji d’ès’ brancher
Et dins l’posse èl capter.
Er’frin :
Su l’nonante trwès pwint neuf
Ele ès’ lome radio Quartz
Su l’nonante trwès pwint neuf
Ele ès’ lome radio Quartz
Et quand on l’choûte in côp
C’èst seûr qu’on l’choûte toudis
Et quand on l’choûte in côp
Bén c’èst come dji vos l’dis.
Ene tchanson pou l'tchand'leû
Tchand’leû
V’là lès p’tits-èfants qu’arindj’nut
In dérin boulome divant l’gnût
Févrî l’mwès l’pus deûr di l’iviêr
Nos fét vîr èl vîye toute au r’viêr
C’è-st-ène feume qui prépâre èl pause
Audjourd’hu gn-âra nén aute chôse
T’t-aleûr ène assiète di rèstons
Mèrit’ra qu’on s’d-occupe pou d’bon.
On ratind lès preumîs solias
Pou rèplacî djèléye èt nîve
Tapant à r’lâye d’su lès potias
Tchèyant rwè come èl vint d’bîje
Ene pîce dins l’mwin tout eureûs
Qué maleûr si jamés èle tcheut
In moncha d’djins crwèt au bouneûr
Vos fèyèz come yeûsse à l’boune eûre.
Er'frin :
V’là qu’c’èst l’tchand’leû
On va l’taper è l’ér
Dji d’è seu bleû
L’rèston è l’ér
V’là qu’c’èst l’tchand’leû
On va l’taper è l’ér
Ah qué tchaleû
L’rèston n’pout tchére
Tchanson d'èl noûve anéye
L’nouvèle anéye
C’èst l'môde di souwétî
A grands rèfôrts di bètchs
Dès bons voeûs sins mèpris
Aus djins qui sont dins l’dèche.
Tout d’abôrd in moncha
Di liârds à pârtadji
Pou lès pauves sins rat’na
Faureut nén lès rouvyî.
Pou lès djins qu’sont malâdes :
Dj’voureu awè l’vac.sin
Qui lès sogn’reut bén râde
Sins l’èr’mète au lèd’mwin.
Lès payîs qu’sont st-en guère
Duvrit s’sèrer l’mwin
Pou pârtadji l’têre
Sins disputes èt trèyins.
I gn-a tant d’maleûreûs
Qui dôm’nut d’ssu lès tch’mwins
Et qui manqu’nut d’tchaleû
Faut nén qu’is crèvîjent d’fwin.
Er'frin :
Vèl-ci l’nouvèle anéye
Qu’èle ni fuche nén fayée
Vèl-ci l’nouvèle anéye
Qu’èle ni fuche nén bacléye.